Sámi fágagirjjálaš čálliid- ja jorgaleaddjiidsearvi
Saemien faagalidteratuvran tjaelijijih jarkoestæjjajsiebre
Sáme fágagirjásj tjállij- ja jårggåliddijijsiebre
  Miellahttun?
  Kontunummirat Norgga- ja Suoma beali miellahtuide gosa sáhttá máksit miellahttoruđa


Sámediggi ii ovddit sámegiela guovttegielalašvuođa ruhtajuolludemiin!
Cealkámuš SFS jahkečoahkkimis Buolmágis 24.04.04

Lea erenoamáš mávssolaš go Sámediggi lagamus áiggis áigu dievasčoahkkimistis meannudit ja mearridit ollislaš sámegiela plána. Sámediggeráđi dieđáhusas sámegiela birra oaidná dan ahte lea dárbu ođastit sihke sámelága ja giellanjuolggadusaid.

SFS atná vuogasin go Sámediggi siskkáldasat ieš dál lea vuoruhišgoahtán sámegiela ja álggahan sierra sámegielprográmma bargiidasas. Prográmma “Sámegielain birge” berre lágiduvvot ja čađahuvvot goit giellalága gullevaš gielddain.

SFS doarju ollásit dan ahte Sámediggi ásaha sierra giellabearráigeahččanorgana dan várás ahte gozihit giellalága áigumušaid ja eavttuid. Ásahussii galgá bidjat doarvái sihke fágalaš ja organiserenresurssaid, vai sáhttá bures lágidit iežas doaimmaid fágalaččat, bagadit ja njuolggadit juksandihtii Sámedikki giellavišuvnnaid, áigumušaid ja doaimmaid.

Sámediggi berre farggamusat evalueret guovttegielalašvuođa ruhtageavaheami, ja rievdadit resurssageavaheami dan láhkái ahte gelbbolaš ásahusat ja joavkkut gos sámegiella ja kultuvrra doaibmá, ožžot eanet geavatlaš ovddasvástádusa čađahit giellaovddideami doaimmaid.

Dán rádjai leat hálddašanguovllu gielddat menddo iehčanassii beassan giellaruđaid geavahit, otnášii árvvomielde 235 mill kr, 33 mill dán jagi, geavahit dadjat juo eaktodáhtolaččat almmá lágiduvvon áigumušaid ja ovddideaddji doaimmaid haga.

SFS vuordá ahte Sámediggi lasiha ruhtageavaheami terminologiija bargguide servvodat surggiin mat oalát váilot. Sámi girjjálašvuođa lágideamis maiddái váilot dávjá resurssat mat duođas ovddidit sámegiela, omd áššeprosai ja dokumentára girjjálašvuhtii.

Sámediggi berre vuhtiiváldit iežas giellaiskkadeami gos evttohuvvui ahte gielddat main leat eanet go 8% sámegielagat, galget beassat giellanjuolggadusaid hálddašanguvlui.

Go Sámedikkeráđđi dál áigu ná viidát ođastit giellaásahusaid ja -doaimmaid, de SFS evttoha ahte Sámediggi doallá stuorit seminára gos plána dievaslaččat meannuduvvo. SFS sáhttá áinnas leat veahkkin lágidit dán seminára.

Almmuhan: 26.04.2004
Almmuhan: Mihkku Solbakk