Sámi fágagirjjálaš čálliid- ja jorgaleaddjiidsearvi
Saemien faagalidteratuvran tjaelijijih jarkoestæjjajsiebre
Sáme fágagirjásj tjállij- ja jårggåliddijijsiebre
  Miellahttun?
  Kontunummirat Norgga- ja Suoma beali miellahtuide gosa sáhttá máksit miellahttoruđa


Ođđa ruhtajuohkin jo árra čavčča:
stipeanddaid sadjái fágagirjjálaš gilvu
Harald Gaski
SFS stivrajođiheaddji

Fágagirjjálaš foanddastivra lea evttohan ahte dan sadjái go almmuhit stipeanddaid dábálaš vuogi mielde, de berre dán jagi iskojuvvot ođđa vuohki mo ráhkadit stuorát beroštumi Sámi fágalaš girječálliid ja jorgaleaddjiid searvvi (SFS) ruhtajuohkimii. Kopiija- ja girjerájusbuhtadusruhta boahtá juohke jagi sámi vuoigŋadujiid vuoigatvuođaoamasteaddjiid buorrin Sámikopiija bokte. 2008 ruđas juhkkojuvvui hui unna oasáš stipeandan go Fágagirjjálaš foanddastivrra mielas eai duhtadan ohcamušat daid eavttuid mat leat mearriduvvon stipeandajuolludemiid hárrái. Dan dihtii hálida foanddastivra iskat ođđa vuogi 2009, ja hálida Fágagirjjálaš foandda almmuhit gilvvu čállit buoremus prošeakta- ja mátkedoarjjačilgehusa. Foanda hálida ohcamušaid sihke fágagirjjálaš teakstabuvttadeapmái ja jorgaleapmái, ja mátkedoarjagiid dáfus foanda sávašii ohcamušaid maid boađusin livčče mátkečállosat maid sáhttá prentet jogo Sámis-magasiinnas dahje goittotge SFSa ruovttusiidduin. Evttohus maid SFSa stivra dál lea guorahallamin, lea ásahit 3 bálkkašumi; 50 000, 25 000 ja 10 000 NOK, ja seammá vuogi mielde maiddá 3 mátkestipeandda 25 000, 15 000 ja 10 000 NOK. Neavvun ja njuolggadeaddji veahkkin ohcančállimis lea stivra maiddá árvvoštallamin ráhkadit skovi mas dárkilebbo čilgejuvvo makkár dieđuid foanddastivra hálida ja dárbbaša ohcamiid hárrái. Eanet dieđut dan birra maŋŋil go SFS- ja Fágagirjjálaš foanddastivrrat leat doallan oktasaš čoahkkima.



Ođasmahttn 13.01.2009
Almmuhan: Webdoaimmaheaddji