Sámi fágagirjjálaš čálliid- ja jorgaleaddjiidsearvi
Saemien faagalidteratuvran tjaelijijih jarkoestæjjajsiebre
Sáme fágagirjásj tjállij- ja jårggåliddijijsiebre
  Miellahttun?
  Kontunummirat Norgga- ja Suoma beali miellahtuide gosa sáhttá máksit miellahttoruđa


Sámi dokumentára ja fágagirjjálašvuohta sámegillii
Sámi fágagirjjálaš čálliid ja jorgaleaddjiid searvi (SFS) lea ilus go Sámediggi lea viimmat mearridan vuoruhišgoahtit sámi dokumentára ja fágagirjjálašvuođa.

SFS lea áigá ovddidan ášši Sámediigái cealkámušaid bokte. Sámediggi lea 2002 váldán vuhtii ahte boahtteáiggi oastinortnet galgá maiddá fátmmastit fágagirjjálašvuođa.

Davviriikkalaš sámi girjjálašvuođa oastinortnet maid Sámeráđđi hálddašii lea áigá loahpahuvvon. Dat lei ge dušše fikšuvdnagirjjálašvuođa várás. SFS lea ovddidan oainnu ahte oastinortnet ii ollašuva jos Norggabeale Sámediggi ii váldde badjelasas ruhtadeami ovddasvástádusa. Muittuhat maiddái mo Norggas leat Kulturdepartemeantta bokte dađis lasihan doarjagat oastit fágagirjjálašvuođa Norgga girjerádjosiidda. Dáža ortnet gusto gal maiddái sámi guovllu girjerádjosiidda, muhto lea dušše dárogielat girjjiid várás.

Ášši viimmat ovdánišgođii 2008 loahpas. Sámedikki soahpamušas dáiddáriiguin daddjo ahte čáppagirjjálašvuođa oastinortnet galgá vuoruhuvvot. Sámedikkis ja dáiddárservviin lea oktasaš lávdegoddi mii bargá áššiin. Ii SÁLAS ii ge SFS leat bivdojuvvon oassálastit. SFS:a bealis leat fuobmán ahte lávdegottis lea sáhka dušše čáppagirjálašvuođas. Go Sámediggi 2008 rájes fas vuoruhišgođii fágagirjjálašvuođa, de lea lunddolaš ahte dákkár girjjit maiddái gullet boahtteáiggi oastinortnegii.

Lea dehálaš fuomášahttit ahte ekonomalaččat dákkár ortnet vuosttamužžan lea ávkin girjelágádusaide. Sii han dan bokte jođihivčče eambbo girjjiid. Ovddeš oastinortnegis ii goaikkihan makkárge buhtadus dahje royalty čálliide. Dán galgá maiddái atnit muittus jos lihkostuvvat oažžut ortnega fas johtui.

Harald Gaski

SFSa stivrajođiheaddji



Almmuhan: 26.03.2009
Almmuhan: Webdoaimmaheaddji