Sámi fágagirjjálaš čálliid- ja jorgaleaddjiidsearvi
Saemien faagalidteratuvran tjaelijijih jarkoestæjjajsiebre
Sáme fágagirjásj tjállij- ja jårggåliddijijsiebre
  Miellahttun?
  Kontunummirat Norgga- ja Suoma beali miellahtuide gosa sáhttá máksit miellahttoruđa


Árvvoštallankursa 2011
SFS lea mearridan lágidit árvvoštallankurssa boahtte jagi. Kursa lea guovtti oasis, mas vuosttas deaivvadeapmi lea beaivvi ovdal 2011 jahkečoahkkima, ja nubbi oassi gis čakčamánus

Kurssas oahppá árvvoštallat sihke čáppa- ja fágagirjjálašvuođa teavsttaid. Kurssas leat 3-4 oahpaheaddji, geat ieža leat oahpahan sihke fága- ja čáppagirjjálašvuođa čállima, lassin dasa ahte doibmet árvvoštallin sihke áviissain ja áigečállagiin. SFSa miellahtuide lea kursa nuvttá, earát fertejit máksit 500 kruvnnu kursadivvaga. Okta oahpaheaddji oahpaha dárogillii, muđui lea kursa davvisámegillii.

Dieđit jahkečoahkkimii ja kursii
2011 jahkečoahkkimii ja kursii dieđiha sierra. SFS miellahtut dieđihit seamma vuogi mielde go ovdal, go vuos čállingoddi lea sádden bovdejumi.

Go kursa lea erenoamáš oahppofálaldat, de leat oahppiide ge sierra vuordámušat. Mii dáhttut ahte go kursii dieđiha, de galgá mielde čuovvut oanehis ovdamearkateaksta, mas lea árvvoštallan makkár nu sámegiel čállosa. Ovdamearkateaksta galgá leat sámegillii. SFS miellahttu, gii áigu čuovvut kurssa, berre sáddet namahuvvon teavstta, ja goit vahku ovdal kurssa. Gii ii leat SFS miellahttu, galgá sáddet teavstta go dieđiha kursii. Muđui ii beasa oassálastit.

Kursa guovtti oasis – jos dasa beroštupmi
Vuosttas deaivvadeapmi lea Romssa universitehtas miessemánu 27. beaivvi. Nubbi deaivvadeapmi čakčamánu álggus. Buori áiggis ovdal nuppi deaivvadeami
galget oahppit leat sádden fágaoahpaheaddjái gárvves árvvoštallama válljejuvvon teavstta vuođul. Teaksta juhkkojuvvo buot oahppiid gaskkas, ja ságastallojuvvo nuppi deaivvadeames. Oasseváldiidlohku mearriduvvo 12 oahppái. Jos kursii ii leat beroštupmi, de čađahuvvo goit jahkečoahkkin, ja dán vuoru dalle fágaseminára haga. Eanet dieđut čuvvot.


Almmuhan: 16.11.2010
Almmuhan: Webdoaimmaheaddji