Sámi fágagirjjálaš čálliid- ja jorgaleaddjiidsearvi
Saemien faagalidteratuvran tjaelijijih jarkoestæjjajsiebre
Sáme fágagirjásj tjállij- ja jårggåliddijijsiebre
  Miellahttun?
  Kontunummirat Norgga- ja Suoma beali miellahtuide gosa sáhttá máksit miellahttoruđa


SFS:s jagi 2013 gudnestipeanda Aage Solbakkii
SFS:a jahkečoakkin 2013 oktavuođas juolludii SFS Foanddastivra jagi 2013 Gudnestipeandda Aage Solbakkii.

Foanddastivrra ákkastallan:

SFS gudnestipeanda Aage Solbakk:i

 

Sámi fágagirjjálaš čálliid ja jorgaleaddjiid searvi háliida gudnejahttit min doaimmalaš miellahtu Aage Solbakk SFSa gudnebálkkašumiin, mii lea kr. 20 000! Dát dahkkui searvvi jahkečoahkkima oktavuođas Kirkonjárggas, miessemánu 25. beaivvi 2013. Aage lea áŋgiris ja beakkán girječálli, čeahpes logaldalli ja movttegis máinnasteaddji. Son leamaš mielde ásaheamen almmuhanvejolašvuođaid sámi girječálliide lágádusdoaimmaid bokte, ja dan láhkai ge leamaš mielde movttiidahttimin eanebuid geavahit sámegiela. Aage lea okta dahje ovttas earáiguin almmuhan badjel 50 fágagirjjálaš girjji ja teavstta.

Aage lea vuosttažettiin historihkár, muhto lea gieđahallan sihke giella- ja oskkoldatfáttáid ja árbevirolaš máhtu iežas čállimis. Sus lea hui govda fágamáhttu, man son ovttastahttá beaktilis ja ealli giellageavahemiin. Dan dihtii su čállin, oahpahanvuohki ja máinnasteapmi lea mielde boktimin lohkkiin ja guldaleaddjiin sámegillii beroštumi, ja movttiidahttimin buohkaid bargat gielain nu ahte ovdanbuktin šattašii buoremus lági mielde. Stiila, dadjanriggodat ja sámegiela estetihkka leat guovddáš áššit Aage čállimis, de son duođaid lea mielde movttiidahttimin gielladiđolašvuhtii buot su gaskkustanbargguin.

Hállojuvvo ollu njálmmálaš árbevieruid birra otne, muhto almmá čállima haga livččii min dálá servodat ollu geafit go maid lea min ollu buriid čálaovddidandoaimmaid geažil. Aage lea mielde čalmmustahttimin man guovddáš ja mávssolaš doaibma čállin lea min servodagas ja son čájeha man dehálaš lea ahte sámit oidnet man mávssolaš lea ovddidit ja árvvus atnit sámegiela.

SFS sávvá Aage Solbakk ollu lihku gudnestipeanddain!





Ođasmahttn 31.05.2013
Almmuhan: Čállingoddi