Sámi fágagirjjálaš čálliid- ja jorgaleaddjiidsearvi
Saemien faagalidteratuvran tjaelijijih jarkoestæjjajsiebre
Sáme fágagirjásj tjállij- ja jårggåliddijijsiebre
  Miellahttun?
  Kontunummirat Norgga- ja Suoma beali miellahtuide gosa sáhttá máksit miellahttoruđa


SFS 2014 jahkečoahkkincealkámuš
"Geassemánus 2013 juolludii Sámediggi sullii 19 mill kruvnna oahpponeavvo­buvttadeapmái, mii iešalddes gal lea buorre. Dat mii ii leat buorre..."

Sámediggi ja sámi girjjálašvuohta

Cealkámuš SFSa jahkečoahkkimis 2014:s

Geassemánus 2013 juolludii Sámediggi sullii 19 mill kruvnna oahpponeavvo­buvttadeapmái, mii iešalddes gal lea buorre. Dat mii ii leat buorre, lea go Sámediggi vuoruhii beali supmis dáža lágádusaide ráhkadit oahpponeavvuid sámi mánáide.

Sámi fágagirjjálašvuođa čálliid- ja jorgaleaddji searvi, SFS, ii sáhte ipmirdit dákkár vuoruheami Sámedikke bealis. Mii leat jáhkkán Sámedikkis galgá leat oppalaš ja ovddasvástideaddji beroštupmi sámi ásahusaide ja sámi gelbbolašvuođa duddjomii. Sámediggi lea ásahuvvon sihkarastin dihtii sámi servodateallima, ja dan sivas galgá leat Sámedikkis čielga ovddasvástádus nannet ja movttidahttit sámi ásahusaid boahtteáiggi.

SFS atná unohassan Sámedikki mannan geasi mearrádusa ja šálloša dan negatiivva váikkuhusa sámi girjjálašvuođa hárrái, go sámi lágádusat leat njunnožis ovdánahttimin sámi girjjálašvuođa. Dákkár daguin lea Sámediggi mielde sirdimin sihke bargosajiid ja maiddái gelbbolašvuođa dáža servodahkii. SFS diehtá maid bures ahte máŋgga dáfus leat dáža lágádusain gilvalanovdamunit mat smávva sámi lágádusain eai leat.

SFS oaivvilda ahte Sámediggi erenoamážit sáhttá iežaset bušeahtaiguin ja prošeaktaruđaiguin nannet sámi ásahusaid ja dagahit ahte gelbbolašvuohta bissu Sámis, ja ahte dat nannejuvvo ovddasguvlui. SFS ballá ahte Sámi girječálliid biras bieđgana jus dákkár vuoruheamit šaddet dabálaččat boahtteáiggis. Dáinna vugiin šaddá Sámediggi háddjejeaddjin girječálliid birrasis, ja čađaha  dákkár juolludanpolitihkka mii láivuda sámi girjjálašvuođa gelbbolašvuođa ja doaibmaneavttuid.

SFS ávžžuha Sámedikki dárkilit geahčadit juolludaneavttuid boahtteáiggi prošeaktavuoruhemiin. SFS ávžžuha Sámedikki almmuhit ahte sii ain áigot vuoruhit sámi lágádusaid ja ávžžuaha ahte Sámediggi váldá duođas iežas geatnegasvuođa  seailluhit ja nannet vuosttažettiin sámi ásahusaid iežas hálddašanguovlluin. Dán ferte hoahpuhit, amas gártat nu boahtteáiggis ahte buotlágan prošeavttaide leat dáža ohcamat mat leat vuođuštuvvon máŋggalágan sámi alibiaiguin. SFS vuordá ahte dat ii  šatta dáhpin.  

Romsa, lávvardat miessemánu 24.b. 2014

Sámi fágagirjjálašvuođa čálliid- ja jorgaleaddji searvi



Ođasmahttán 23.09.2014
Almmuhan: Čállingoddi