Sámi fágagirjjálaš čálliid- ja jorgaleaddjiidsearvi
Saemien faagalidteratuvran tjaelijijih jarkoestæjjajsiebre
Sáme fágagirjásj tjállij- ja jårggåliddijijsiebre


Jahkečoahkkin ja fágaseminára
SFS jođiheaddji, Harald Gaski

Vássán ruhtadoallojagi lea SFS geavahan nu stuorra oasi ruđainis doaimmahit Sámis-áigečállaga ahte bázii menddo vátni ruhta juohkigoahtit stipeanddaid. Dan dihtii searvvi ja fágagirjjálašfoandda stivrrat mearridedje juohkit kollektiivvalaš stipeandda daid miellahtuide geat servet SFS jahkečoahkkimii Dublin-gávpogis Irlánddas. Doppe dollo jahkečoahkkima lassin fágaseminára min irlándalaš fágaguimmiid vásáhusaid birra heaibut unnitlogugiela ovddas EO-riikka siskkobealde. Midjiide šaddá miellagiddevaš gullat mo EO lea váikkuhan sin giellaviggamušaid hárrái, ja šaddá maiddá somá gullat man olu girjjit ja čállosat duođaid almmuhuvvojit dál irlánddagilli. Sin rahčamušat begget Eurohpas buorrin ovdamearkan mo unnitlogugielat sáhttet ahtanuššat EOa siskkobealde, de min diliid hárrái báhcá jearaldahkan manin dat seammá ii leat dáhpáhuvvan sámegielain Ruoŧas ja Suomas?

Muhtumat soitet jearrat lea go dá rivttes vuohki mo golahit searvvi buhtadusruđaid. Daidda geat eai gula SFSii lea hui álkkes vástádus ahte dát ruđat leat min iežamet - daid leat mii ieža tinen Norgga buhtadusortnegiid bokte, de dasa ii dárbbaš sámi almmolašvuohta seaguhit iežas dađi eanet go gean ge eará ovttaskas olbmo beaivválaš ruhtageavaheapmái. Daidda geat gullet SFSii ja dáidet jearrat manin mii ná dahkat, lea álkkes vástádus dat ahte stivra lea jearran miellahtuin ráđi, ii ge oktage leat vuostálastán jurdaga, baicce dieđihedje álggus mesta 40% searvvi miellahtuin ahte sii servet mátkái. Dađebahábut leat de muhtumat geassádan das rájes, muhto ain leat eanebut vuolgimin Dublinii go geat leat oasálastán SFSa jahkečoahkkimiin Álttas, Ohcejogas ja Kárášjogas! Dan dihtii sávan buriin oamedovdduin sidjiide geat vulget Dublinii bures boahtin oahppomátkái.

Lea somá registreret dan stuorra beroštumi mii leamaš miellahtuid gaskkas searvat mátkái, vaikko vel ieža gártet ge máksit das oasi. Lea oppalohkái hávski oaidnit man olusat leat dieđihan iežaset miellahttun SFSii maŋimuš jagiid. Mii leat jo badjel čiežalogis oktiibuot. Lean hui ilus das go nu olusat atnet mávssolažžan leat mielde SFSas. Doaivvun ahte sii maiddá leat ilus dainna bargguin maid searvi viggá čađahit sámi almmolašvuođas - ja erenoamážit min viggamušain cegget áigečállaga mii sáhtášii váikkuhit jagiid ovddosguvlui!

Harald Gaski

SFS stivrajođiheaddji

Almmuhan: 10.04.2006
Almmuhan: Mihkku Solbakk