Sámi fágagirjjálaš čálliid- ja jorgaleaddjiidsearvi
Saemien faagalidteratuvran tjaelijijih jarkoestæjjajsiebre
Sáme fágagirjásj tjállij- ja jårggåliddijijsiebre


Gudnistipeanda Svein Lundii
Svein Lund oaččui SFS 2011 gudnistipeandda. Duođaštus geigejuvvui sutnje jahkečoahkkimis Tromssas miessemánu 28. b. 2011.

SFS gudnistipeandda njuolggadusain daddjo ná:

"Gudnistipeandda sáhttá juohkit foanddastivrra iežas ákkastallama vuođul,
"ja das árvvoštallojuvvo kandidáhta buvttadeapmi dahje bargu searvvi
"buorrin. Erohus dábálaš juolludemiid ektui lea ahte prošeakta ii dárbbaš
"leat njulgestaga čadnon čállosa dahje sámegielat čállosa buvttadeapmái,
"muhto juogalágan doibmii mii lea mielde ovddideamen dieđuid ja
"beroštumiid sápmelaččaid, sámi kultuvrra ja/dahje SFS birra.

"Fágagirjjálaš foandda stivra sáhttá dan juohkit olbmui gii ánssáša "erenoamáš fuomášumi dahje gudnejahttima searvvi bealis.

Foandda stivra ii leat dán rádjái addán ovttage gudnistipeandda. Ii dan sivas ahte njuolggadusaid vuođul ii livččii gávdnan buriid evttohasaid, muhto baicce dan sivas go foandda stivra lea vuorddašan ahte SFS miellahtut dat evttohit geasa galggašii geiget dákkár stipeandda. Dál de lea boahtán evttohus, ja stivra lea ovttajienalaččat čuovvolan evttohusa.

Ákkastallamis daddjo:

Dát olmmoš lea guhká leamaš čuožžilis, duostilis ja erenoamaš viššalis sámi servodaga ja kultuvrra bealušteaddji. Dán son lea erenoamážit čájehan eatnat lohkkičállosiiguin dáža aviissain. Dán sámi bealušteami geažil lea son šaddan gillat garra vuostečállosiid. Son lea gaskkohagaid leamaš olmmoš gii min ovddas duostu njuolaid maid "vašálaččat" báhčalit min guvlui. Mii eatnašat bállet ráfis bargat čálakultuvrra, giela ja servodaga ovddidemiin, eat dárbbaš duostut buot fallehemiid. Dát olmmoš bargá goappašagaid. Erenoamáš stuorra girjedoaimmaheami prošeakta, namalassii Sámi skuvlahistorjá, dáidá okto fuobmášahttit dán olbmo bargguid árvvu, Doaivagiin ahte ii vel livččii váiban ja basttehuvvamin, fállat mii Svein Lundii SFS 2011 gudnistipeandda, man sturrodat lea NOK 20.000,-.



Almmuhan: 28.09.2011
Almmuhan: Webdoaimmaheaddji