Sámi fágagirjjálaš čálliid- ja jorgaleaddjiidsearvi
Saemien faagalidteratuvran tjaelijijih jarkoestæjjajsiebre
Sáme fágagirjásj tjállij- ja jårggåliddijijsiebre


Árbevirolaš máhttu
Árbevirolaš máhttu - bivnnut seminárafáddá

DOAIMMAHEADDJI:

Bivnnut fáddá fal - muhto doaivumis ii dušše seminára- ja akademihkalaš dutkanfáddán. Boazodoallu lea aiddo čađahan seminára mas guovddáš fáddán lei boazodoalu árbevirolaš máhttu, ja mo das ain anášii ávkki. Boazodoallit dáhtošedje ahte ođđaáigásaš boazodoalus galgá maiddái vuhtii váldit árbevirolaš máhtu. Muhtimat leat čuoččuhan ahte aiddo dat go boazodoallu lea bággejuvvon hilgut árbevieruid, de dat lea dehálaš sivvan dasa go ealáhusas leat erenoamáš váttisvuođat.

Go SFS lea bidjan árbevirolaš máhtu seminára fáddán, de lea dat ee. danin ahte fuobmášahttit man olu fágalaš ja teorehtalaš diehtu sámi akademihkkáriid gaskkas lea sámi árbevieruid birra. Ja ain deháleabbo, akademihkkáriid ovddasvástádus das ahte ovttas singuin geaid duohkin dákkár máhttu ain lea, seailluhit dan boahtte buolvvaide. Vuoigŋaduoji vuoigatvuođa servviide gullá dasto maiddái dat ahte fuobmášahttit mo vierrásat áinnas dolvot min máhtu, ja dahket das alcceseaset gávpe-gálvvu. Ja dan leat dán rádjái dávjá dahkan lobihaga. Eamiálbmogat leat dán ge oktavuođas vealahuvvon. Ii go son diet leat rivttes doaba dása?

Go geahčasta WIPO - ON vuoigŋaduoji vuoigatvuođa organisašuvnna - čohkken dieđuid, de lea aiddo dat mii lea leamaš oalle dábálaš. Miellagiddevaš lea dalle dán oktavuođas fuobmášahttit dan ahte Sámis mii gal orrut eanemusat leat bázahallan vuoigŋaduoji gáhttendoaimmain. Dasa dieđusge lea Davviriikkaid fuollameahttunvuohta dehálaš sivvan, ja dat ge ahte min lagamus siidaguoimmit leat viššaleamosit “suoládan” mis. Dát ge lea SFS fágaseminára fáddán cuoŋománu 4. b. Álttás.

Almmuhan: 30.10.2004
Almmuhan: Mihkku Solbakk