Sámi fágagirjjálaš čálliid- ja jorgaleaddjiidsearvi
Saemien faagalidteratuvran tjaelijijih jarkoestæjjajsiebre
Sáme fágagirjásj tjállij- ja jårggåliddijijsiebre
  Miellahttun?
  Kontunummirat Norgga- ja Suoma beali miellahtuide gosa sáhttá máksit miellahttoruđa


Sámis nr. 3
Nuvttá!
Dáinna nummiriin mii fátmmastat oalle viidát. Goit fáttáid dáfus – ja davvisámegillii. Dattege vehá eambbo go goaikkanas máttasámegillii ge. Dás lea sihke jurddabiebmu, duohta diehtu (faktat), oahpahus, ja vel geahppasat dahje suohttasat guvlui lohkosat ge - nie mo koseriijat dábálaččat galggašedje. Bieđgguid miehtá dán nummira gávnnat maiddái historjjálaš dáhpáhusaid Sámis oanehaččat čálistuvvon. Diet eai oidno 4. siiddu sisdoallolisttas. Diet lista lohpida olu, ja doaivut de ahte čállosiid sisdoallu duhtada olu mielaid ja beroštumiid.

Viečča Sámis 3 dás

Dearvuođat Sámis doaimmahusas!

Áigguimet giddet 100 dehálaš dáhpáhusa Sámis Sámis goalmmát nummirii, muhto eai čáhkan eambbo go sullii 20. Diet áigumuš, 100 dáhpáhusa, bohcidii muhtinlágan ”vuosteávvudeapmin” dasa go Norggas ávvudedje riikka 100 jagi miehtá mannan jagi. Áigguimet mii ge ávvudit dien oktavuođas, muhto eat riekta gávdnan maid. Eat mii vuos goit sáhttán Sámi iešmearrideami ávvudit. Vaikko vel ii leažžá ge nu olu maid ávvudit, de mii joatkkášeimmet áinnas historjjálaš dáhpáhusaiguin. Dasa gal dárbbašivččiimet goit vel Sámis 4. 5. ja 6. nummira, ahte ollašuhttit vuosttas 100. Daid nummiriid birra gal eaba dieđe doaimmaheaddji guovttos vuos olus maidige.

Jos de šaddá joatkka Sámisii - sámi čálakultuvrralaš áigečállagii, de gal šaddat maiddái digaštallat dan man galle sámegiela galgat geavahit. Máttasámi čállit gal leat searvan SFS:a erenoamáš giellaovddideami áigumuššii, julevsámi čállit eai vuos. Lohpideimmet Sámis 2. nummiris 5000 kr. buoremus julev- ja máttasámi teavstta ovddas. Eat dárbbašan vuos geavahit dien ruđa. Dán nummira máttasámi teavstta mii leimmet dáhtton čállis, de son oažžu min dábálaš buorre mávssu dan ovddas.

Dasto mii sávvat hávskkes giđđageasi juohkehažžii gii dán čállosa gillii lohkat, ja doaivut návddašat Sámis vaikke miehtá dán geasi!

Harald Gaski

John T. Solbakk

Ođasmahttán 09.05.2006
Almmuhan: Mihkku Solbakk