Sámis 14

67 / 68

Sámis 14/2013 67
lobálaš – de ii galgan gullot ii jietna ge amas gávn­
nahallat. Don maid vigget bagadit mu mo buođđut,
oaidnit botnis mo lea luossajohtolot, gokko luossa
čákŋá fierbmái. Meahccejohtimiidda don maid oah­
pásmahttet mu, ja duháhiid muitalusaiguin don dah­
kat meahcásteami geasuheaddjin, beanta niegadin
rievssatbivdin álgit, vaikko ieš gal nuppiin sániiguin fas
dahket čielggasin munnje ahte dat áiggit leat meattá
goas dainna doaimmain sáhtii iežas ja bearraša ealihit.
Jáhkán don hálidit mu válljet skuvllaid vázzit, ja
du iešalddes dajakeahtes ávžžuheapmi, muhto datte­
ge linjáid gaskkas movttiidahttin oalgguhii mu vuolgit
Tromsii studeantan. Muittán mo don lávejit jearahit
mo mus manná, maid oahpan ja du sáhkagoiku sih­
ke mu mátkkoštemiid birra ja dat vuohki mo oaččuhit
mu muitalit, jáhkán dan leamaš mielde dahkamin mu
danin gii dál lean. Mun loavttán, mun návddašan mui­
talit, juogadit dan maid lean vásihan ja oahppan. Du
movttáskuhttin oktan mu áhči muitalusaiguin máilm­
mi birra, mo moai áhčiin čohkkáime ja joraheimme
globusa, ja áhči muitalusat dievva báikkiid ja riikkaid
birra – gos ii gal ieš lean goassige fitnan, muhto maid
birra lei lohkan, ja danin diđii maid muitalit – mun
jáhkan buot dat oktiibuot adde munnje miela vuolgit
jođašit máilmmi.
Lea jo áibbas sevnjodan. Mu miellajohtin –
mátkkoštit mielas, nugo Áillohaš lávii dadjat – lea
doalvvuhan mu oalát. In leat čoskkedan, ii leat šat ah­
kit, dušše muittut dievva oaivvi. Ja ohcaleapmi. Go
don it leat šat. Ii áhčči, ii ge eadni. Rikkis gáldut goikan.
Lieggalágan savda. Laksi jo suinniin. Iđitluvva­
goahtá, oanehis čakčageasi seavdnjadas mieđiha
čuvgii. Čuožžilan mielleravddas ja vázzilan visttiid guv­
lui. Arvi lea láktadan busira, muhto in čoskket go lieh­
mu lea ain ja biegga lea golken. Čohkánan du viste­
tráhpa ala. Fáhkka it leat ge šat dušše don, muhto olles
báikegoddi mu mielas – bajásšaddama oahpes, ráh­
kis guovlu mii gáibida olbmuid fas ásaiduvvat báikki
ala daid sadjái geat leat jávkan. Vai ánuheš go. Gilli ii
galggašii jápmit. Ii galgga! Oadjebas ráfi geasuha.
Gal don ain bagadat. Dáiddán mun boahtit?
Heivehuvvon ja ođasmahttojuvvon Nuorttanástte
čállosa vuođul 1983:s.